Barcelona Watanguliza Mguu Mmoja Nusu Fainali Ligi ya Mabingwa

Klabu ya FC Barcelona imepiga hatua kubwa kuelekea nusu fainali ya Ligi ya Mabingwa baada ya kuibuka na ushindi mnono wa mabao 4-0 dhidi ya Borussia Dortmund katika mchezo wa mkondo wa kwanza wa robo fainali uliochezwa kwenye Uwanja wa Olimpico de Montjuic.​

Barcelona chini ya kocha Hansi Flick, wamekuwa na muendelezo mzuri wakikumbusha enzi za mafanikio makubwa ya klabu hiyo. Utatu wa washambuliaji—Lamine Yamal, Raphinha, na Robert Lewandowski ulikuwa mwiba kwa safu ya ulinzi ya Dortmund, wakifunga mabao yote manne ya ushindi huo.

Raphinha alifungua ukurasa wa mabao kwa Barcelona, akifunga bao la kwanza katika dakika ya 25. Lewandowski, licha ya umri wake wa miaka 37, aliendelea kudhihirisha uwezo wake wa kufumania nyavu kwa kufunga magoli mawili, na kufikisha jumla ya mabao 40 msimu huu. Lamine Yamal, kijana mwenye umri wa miaka 17, alikamilisha karamu ya mabao kwa kufunga bao la nne kwa ustadi mkubwa. ​

Katika safu ya kiungo, Pedri na Frenkie de Jong walidhibiti mchezo kwa umahiri mkubwa sana, wakisaidiwa na Fermín López ambaye pia alionyesha kiwango cha juu. Safu ya ulinzi, ikiongozwa na Jules Koundé, Pau Cubarsí, na Iñigo Martínez, ilihakikisha Dortmund hawapati nafasi ya kufunga, huku kipa Wojciech Szczesny akifanya kazi nzuri langoni. ​

Ushindi huu mkubwa wa Barcelona umeibua matumaini mapya kwa mashabiki wa Barcelona, wengi wakiona timu yao ikirudi katika enzi za mafanikio makubwa. Baadhi ya wachambuzi wameeleza kuwa kwa mara ya kwanza tangu kuondoka kwa Lionel Messi, Barcelona inaonekana kuwa na kikosi chenye uwezo wa kushindana kwenye ngazi ya juu barani Ulaya. ​

Kwa ushindi huu wa mabao 4-0, Barcelona wana nafasi kubwa ya kufuzu hatua ya nusu fainali, huku Dortmund wakikabiliwa na kibarua kigumu katika mechi ya marudiano. Hata hivyo, kocha Flick amesisitiza umuhimu wa kuendelea kuwa makini na kutozubaa katika mchezo ujao ili kuhakikisha wanafikia malengo yao ya kufika mbali zaidi katika michuano hii.